آختارماق و یا آختارماماق، مسئله بودور

یئددی گئجه، یئددی گوندوز اویاق قالدیم، تاریخ نادرینی

بیر دفعه داها باشدان سونا قدر اوخودوم. سونوندا، دونن گئجه باشادوشدوم.

آدامین بیرینین چیراغینین نفتی بیتمیشدی. اوزون سوره ائوینده گئجه لری زیل قارانلیق ایچینده قالیردی. چونکو چوخدانیدی کندلرینده نفت تاپیلمیردی.
بیر گئجه یاریسی، ان باهالی وارلیغی یعنی اوزویونو ائوده دوشورر. اوتورار دوشونر. «گوره سن نه ائله ییم، اوزویو‌ بو قارانلیقدا نئجه تاپیم؟» دئیه، اؤز -اؤزونه میریلدانار.
بیردن نه ائده جه یی یادینا دوشر. پنجره نی آچیب باشینی یوخاری قالدیرار. پروبلمینی آیداکی آغانین شکلینه سؤیلر.
آغا دئیر: عزیزیم! مادم کی ائوین ایچی قارانلیقدی، گل اوزویونو ائشیکده آختار.
آدامی گولمک باسار. آیداکی آغانین شکلی دئیر:
نئیه گولورسن؟ من آلله آدامییام، اوزومدن ساچان نور هر یئری آیدینلادیب. باخ! هامی ائوینده ایتیردیگی شئیینی چیخیب ائشیکده آختاریر.
آدام دؤنوب کوچه ده ساغینا سولونا باخار. تعججوبله گؤرر جاماعات باش آشاغی اویان -بویانا گئدیب بور بوجاغی، زیبیللرین ایچینی ائشه له ییرلر.
آدام جاشمیش وضعیتده بیرآز دورار آمما سونرا او دا آیداکی آغانین شکلینه اینانار و اوزویونو ائشیکده آختارماغا باشلار.
بیر ایکی ساعات بو شکیلده کئچر. یاواش یاواش بو آختارماق ایشی بایاغی خوشونا گئدر. هردن باشینی قالدیریب، قونشولارینا گولومسه یر، اونلار دا اونا ال ساللارلار.
ائرته سی گئجه و بیر سونراکی گئجه لرده هرکس کیمی ائشیگه چیخیردی. هامی اؤزویله چای، کئک، مئیوه، زیمیشقا گتیریردی. اوتوروب صؤحبت ائله ییردیلر. دئییب گولوب آختارماق ایشینه باخیردیلار. آرتیق نئیی آختاردیقلارینی بئله اونوتموشدولار و اومورلاریندا دا دئییلدی. ساده جه گئجه لری هامیسی ائشیگه چیخیب بیرلیکده آختارماقدان خوشلانیردیلار.

دونن گئجه من تاریخ نادرینی بیر دفعه داها باشدان سونا قدر اوخومایی بیتیردیم و بیزیم جاماعات نئیه اؤز آنادیلینی بوراخیب باشقا بیر دیلده یازیب پوزماسینی آنلادیم.

آیداکی آغانین شکلی زیمیشقا دولو پاکئتینی الینه آلمیشدی.‌ منه گؤز‌ قیرپیب آشاغییا ایشاره ائله دی. زیمیشقاسینی چیتلاییب قابیقلارینی آشاغیداکی ائشه له نن جاماعاتین اوزه رینه پوفله ییردی، هردن ده منیم الیمده کی تاریخ نادری کیتابینا باخیب اوجادان گولوردو