Bu gedişatla bu xalq, aqibətin bilməyəcəkdir
gələn il, ac qalacaq onda bəs hardan yeyəcəkdir?
ağaca dırmaşcaq serçələri ovlayacaqdır
o da qurtulsa gedib kərdidə qurd quş güdəcəkdir
əyilib min deməyə, düşkün olan bir belə millət
belinə qaldıracaq hər gələni gəzdirəcəkdir
Vəli də ensə bizim, millətimiz heç dözə bilməz
Əliyə boynun əyib gəl, mən ölüm min deyəcəkdir
Şah enib Molla qoyubdur belinə köhnə palanın
o da getsə yerinə, Şah bala oğlan gələcəkdir
göy çəmənlər yanacaq, gölləri də çöl olacaqdır
“mənə nə” hamı deyib millətimiz dinməyəcəkdir
işlər işdən keçəcək, eşşək acından öləcəkdir
sonra şair yazacaq eşşəyə fəryad edəcəkdir
şairi dinleməyib eşşeyə yas tutmayacaqdır
millət asla yuxusundan da heç əl çəkməyəcəkdir
xalanın xatırinə, xala-qızısı hörmətinə
yorqanı qövzamadan, fəqət bir ax vay deyəcəkdir
yatalaq xalqımızın, taleyi çoxdan qanayıbdır
quruyan göldən əsən yel, yaraya düz səpəcəkdir
qurbanam xalq-ı şərifə yuxuda, qarpız əkibdir
yuxudan dursa əyər, tarlada kəssək biçəcəkdir
bura əllamələrin yurdudu qardaş xəbərin yox
bacadan boldu bu xalq, hər bacaya girməyəcəkdir
fışqırır hər bacasından quru bilgi dolu söhbət
çox bilən millətimiz hikmətə pambıq təpəcəkdir
özü bir tanrı, sözü vəhy kimi, xətm-i kəlamdır
yeri gəlsə oturub tanrıya da dərs verəcəkdir