پورسوخ

چوخوموزون اوشاقلیق گؤنلردن، بعضی دوزسوز شوخلوقلار یادیمیزدا قالمیش اولمالیدی

اونلارین لاب ایرگنجی ” پورسوخ – دولدور ” شوخلوغویدو

مدرسه یولوندا، تام ده سنین فیکرینین او داغیناق واختی کی، اطرافیندا گلیب گئدنلری هئچ  گؤرمزدین، بیردن – بیره  طرف  ناقاغیل اوستوراق کیمی هوببولاردی سنین اؤنونه. ساغ الینی ایکی قیچلارینین آراسینا آپاریب و اوجادان دئیردی

!!!!پورسوخ

سنین اوستونه هوجوم گتیرن او وحشی پورسوغون آردیندان، اَییلمه مک، مومکون دئییلدی. یا قورخودان ایکی قات اولاردین یا دا سانجیدان

 سنین یئرینه “کیرال آرتور” بئله اولسایدی، قورخماسایدی دا یقین کی قیچلارینین آراسینا گلن او یوموروغون سانجیسیندان بئلی بوکولردی

هر حالدا پورسوقدان اییلمک، قورخماق آنلامیندایدی. قورخماغین دا جزاسی، دولدورماغیدی

آغزینین ایچینی، هاوایلا شیشیره جکدین کی، طرف سنه پورسوق ائله دیگی او ساغ الینین بارماقلارینی بیر یئره ییغیب و چکیش کیمی صوراتینین شیشمیش طرفینه یاپیشتیرسین

هله ایش بونونلا دا بیتمزدی کی. آغزینین هاواسی بوشالاندا، ” پیرت ” سسی چیخارتمالیدین، یوخسا تازادان دولدورماق زوروندا قالاجاقدین. چونکی آنلاشما بئله ایدی و بیزیم زامانیمیزدا دا هامی بو آنلاشمالارا بویون اَیَردی و اونلاری قبول ائدردی

اوزون لافین قیساسی، بیزیم او اوشاقلیقلاریمیزدا کی ایرگنج شوخلوق، بیلیرمیسیز بو گون منیم آغلیما نئیی چاتدیردی؟

ایرانین بو نوکلوآر اولایی و آتوم انئرژیسی مسئله سینده، باتینین (غرب) پورسوغوندان هم ایران دؤولتینین قورخوب، اوستورتماغا توشمه سی بللیدی، هم ده ایران میللتینین سانجیدان، بئلی بوکولوب ایکی قات اولماسی

 بیر شئیی دوشونورم، بلکی ده باتی (۱+۵) یوموروغونو بیزیم دؤولتین شیشمش صوراتینا اندیرنده، ” پیرت ” سسی چیخارتمیر، اونا گؤره ده بو مسئله هئی اوزانیر. حل اولونمور و بو کونفرانسدان اوبیری کونفرانسا سورونور